風和日麗

《三千年後》 曲：陳輝陽 文：陳慧 獨白：李香琴

再見　唔好怪我第一句就同你講再見
因為我真係專程來同你道別

你知道我係邊個架　不過你唔記得咗之嘛
我記得你　你總係笑咪咪咁望住我
你唔講嘢　淨係聽我講嘢
嗰陣時個世界好安靜　無而家咁嘈
襯得我特別吱喳　特別開心

我記得你隻手掃過我背脊嘅感覺
我記得同你去睇影畫戲　你會係我耳仔邊講嘢
你講得好細聲　其實我一D都聽唔清楚
不過　我好鍾意聽你咁樣同我講嘢
以後　再冇人咁樣同我講嘢喇

我記得你好鍾意睇日落　睇完日落
就會去聽音樂會　我哋又成日散步去食宵夜
嗰陣唔知點解　周不時都分唔清楚究竟係星期幾
日子好似唔會過去　時間都好似停咗落嚟
然後　忽然間　就發覺原來已經經過咗好多年

我記得　好痛　因為你話畀我知你要走
我無再睇過日落　亦都無再同人食宵夜
原來　難過的日子　一樣係好似唔會過去
然後　又係一眨眼　至發覺已經過咗好多年

我記得　你同我去過嘅每一個地方　我唔會再去
嗰D茶座、舞廳同花園　而家係點
我唔知　嗰D地方通通留喺我心裏面
不過　我知道　你唔記得架啦
唔緊要　我一個人記住就得啦

我唔會講　我老啦
我只係會講　我喺度太耐
時間耐咗　難免知道人總會慢慢咁將過去淡忘
又會睇住D嘢無聲無息咁樣消失

我點解要走　怪我自己啦
我先兩日　唔知諗緊乜嘢
無端端走咗去睇日落
個日落　就同我記得陪住你睇嗰個樣一樣
不過就算我點樣裝出若無其事
我都冇辦法唔承認
我失去嘅嘢實在太多喇

我要走喇　如果你記得番我係邊個
我知道　你一定會好唔捨得我
仲會好掛住我
再見